Monday, March 27, 2006

Doding i Elim

dakdanak murid sikolah minggu GKPS sonari.

Elim na sihol huturi-turihon on lang Elim na i bibel in. Elim panti asuhan do. Panti asuhan napinajongjong ni Diakonia HKBP, na marianan i Siantar. Hu jon ma hanami sanggah sikolah minggu naboron iboban guru Sikolah Minggu (SM) nami mardalani, tar songon na mar study tour nini halak sonari. Sanggah kalas onom SD ma ra au ijia, 28 tahun nasalpu.

Sapala na boi hudingat, piitah in ma study tour sadokah au marsikolah minggu i gareja nami, GKPS Sarimatondang. Nahubotoh sanggah ai, dong lobih-lobih ni duit hun acara marjagal-jagal Natal. Gabe iputushon guru sikolah minggu ma ase ipakei in laho marstudy tour. Hu Elim ma sada tujuan nami. Legan ni in, hu Kobun Bunga pakon hu Kobun Binatang. Ganupan in i Siantar do. Lang pala daoh hun huta nami, Sarimatondang. Tar 45 minut do hansa marmotor sewa borongan. Janah sonon ma ruhut ni pardalanan nami: Sarimatondang-Panti Asuhan Elim-Kobun Bunga-Kobun Binatang-Sarimatondang (use).

Domma dohor hu pardeteng ni ari sanggah das hanami i Elim. Mittor songon na himong do diri mangidah Siantar on. Age pe domma bahat singat-singat ase nijaga pangabak, ulang patanda tu hanami na lang pala gati hu kota, totap do lang tarpabuni bahasa parhuta-huta do diri. Mangkawah ma au hu alaman ni panti asuhan ai na bolag tumang. Dear homa bunga-bunga, rumput pakon suan-suanan na legan na dong ijai. Dong ianan marguro-guro. Dong awal-awal (ayunan), dong unggal-unggal (enjot-enjotan nini anak TK sonari).

Halani ai, dobkonsi turun hanami hun motor namamboban hanami, mittor marlittun ma au pakon piga-piga hasoman hu ianan marguro-guro in. Natakkas hudingat hasomanku hujai aima St. Jan Winner Sinaga, sonari ia sittua i GKPS Cililitan. Mittor sihol ma hanami pasombuh tagas marunggal unggal pakon manakkei hu awal-awal ai.

Tapi lang pala opei isuba hanami, mittor idilo guru sikolah minggu ma hanami. Manggila guru ai hubakku pakon piga-piga hasoman. Amboru diri do guru ai. Nini:"Lang nalaho marguro-guru hita hujon da. Na laho manohu sanina do."
Sib ma hanami.

Iarahkon guru-guru ma hanami hubani sada ianan harungguan na tarbolon, songon aula ma ra ai. Hundul ma hanami i hundulan sabolah siambilou. I sabolah siamun aima hasoman pangisini panti asuhan in. Sanggah hutailihon nanget dompak sidea, hubotoh ma na lang dong imbarni sidea hun hanami age pe nabotoh do lang marbapa marinang be sidea. Gariada taridahan do minar ni bohi ni sidea. Keskas. Megah do sidea mangidah parroh nami. Kekkekan nadeba, lang ra sossoh, puas-pais marlinggot hu lobei hu pudi. Bisong do tangaran suara ni sidea.

Dobkonsi manluar pe sahalak pangurus ni panti ai ase minop otik. Marsipatanda diri ni bei ma homa pangurus panti pakon guru-guru sikolah minggu nami. Ipatorang sidea ma hinaotikni aha ma horja ni sidea ganup ari. Piga halak parhorja namangkoseihon panti in, piga halak pangisini. Ija bei sidea marsikolah. Pakon sambatni.

Lang pala hudingat be ai ganup. Na takkas huparuhurhon ai ma sanggah hasoman nami dakdanak pangisi ni panti in marodor mardalan hulobei. Markoor ma sidea. Lang boi hulupahon doding ni sidea in, hansi pe ai opei ongga hutangar:

Ai namarsanina hita on hape
Lang be marna mubah barang ise pe
Legan bei hatanta ge tanoh ta pe
Sada do Bapanta dingat hita bei

Sada do Bapanta Sipagoluh in
Mansarihon hita sadokah ni in
Haganup goluhta ge bohalta in
Sada do Bapanta pasirsirhon in

Tong do ipareksa hita on hape
Sanggah marsikolah I alaman pe
Seng na tarhorjahon haganup hape
Anggo lang Bapanta I lambungta bei.

I pudi ni ni ari hubotoh ma na dong do hape doding on i Buku Doding Haleluya. No 298, ibuat hun Choral Buch 266, Karl Groos, 1818. Anggo sadari ai, songon doding nabayu tumang ma ia bai pambogeihu. Sonai do ra age hasoman na legan. Lang pala boi idihutkon hanami mandodingkonsi. Hapeni, anggo hasoman pangisini panti in, hira ganup do dihut mangirikkon nanidodingkon ni parkoor na i lobei in.

I bagas danak ni akkula anggo mangihutkon umur, boi do iparimbagashon hanami aha do tonah ni doding ai. Na lang dong hape imbarni sidea pakon hanami. Age pe siidopan do pargoluhan ni sidea. Masombuh halani gira ma lang ibotoh sidea bei sondia sonangni namarmatoras. Tapi dong do Bapa na ibabou parorotkan ganup jolma. Janah dos do Bani ise pe, joma namarbapa-marinang pakon sidea natading maetek.

Sabou do naming uhur bani tonah ni doding ai. Tapi lang boi homa tarponophon udung ni uhur, sanggah lambin bagas idodingkon sidea doding in. Tariluh panaili. Hudingat ma turi-turian ni bapa nami, na dob tading maetek do ia sapari halani gira do matei ompung boru ondi. Hudingat ma homa, au pe dong do piga-piga hasomanku i huta na lang marinang atap marbapa be. Tapi na lang marbapa lang marinang, songon na i panti on, ise ma nani? Bagas-bagas hupikkiri, hudingat-dingat, lang dong opei, janah sai ulang ma namin. Mardingat in use, lambin gok iluh ma panonggorhu. Janah unduk ma au ase ulang ididah hasoman.

Doding Ai Namarsanina in mambahen dokah au marpikkir-pikkir. Ge pe sonin ma masombuh sidea hasoman na i panti on, itadingkon namatorasni bei sanggah poso tumang sidea, lang tarpunjung hape sidea. Minar do bohi ni sidea. Lang taridah be namagouan holong sidea. Bosing do sidea sanggah marguro-guro. Lang pala etek homa uhur ni sidea mangidah hanami. Aha do nani namambahen lang taridah borit ni sitaronon in bani sidea? Halani bahat ni bilangan ni sidea do? Sidea nasapangahap sapanaronon? Halani doding ai do nani namangojur sidea ase mangkagoluhkon hata in, bahasa ija pe bahat do sanina pakon sindohor marhitei Bapa in?

Dob honsi marujung panohuon nami i Elim, borhat ma hanami hu Kobun Bunga pakon Kobun Binatang. Tokkin, salud ma horu ni uhur. I kobun ai, sagat ma hanami marlittun hujai-hujon, halani tongon-tongon pe kobun in Kobun Bunga. Lang taretong be piga hali au manakkih tangga ni menara i tongah ni kobun ai. Piga hali homa gopas, marsidorongan pakon hasoman marlumba parlobei das hudatas. Maronjat-onjat ma homa. Sonang pangahap halani nianggap domma nabotoh sondia do daini parguro-guroan i kota. Janah dong ma pangahap ge pe parhuta-huta diri, domma dos songon par kota.

Sonai ge i Kobun Binatang, lambin megah ma hanami homa. Lang pala napardiateihon be anggo songon hereh na hettus mangindoi hasang bani ganup jolma na dohor hun iananni. I huta pe sapari bahat do hereh, tarlobih ma ai i dalan hu Aek Simatahuting pakon Aek Manik. Sepeda air do na poltik huparuhurhon, halani in pe hubotoh na boi do hape mar lereng i bah. Songon manuk-manuk homa ibahen rupa ni.

Das hu bod ni ari do hanami i Kobun Binatang in. Ge pe lang sombuh opei tagas manorih ganup na dong ijai, pukul onom botari surut ma hanami hu motor na mamboban hanami mulak hu Sarimatondang. Dob konsi martonggo laho mulak, soppat do mandoding hanami piga-piga hali sambil mardalan motor nami kaluar hun Siantar. Tapi dob ni ai, tartunduh bei ma homa hanami das hu na tiba i gareja GKPS Sarimatondang.

Ari minggu mukkah ni, sanggah marsikolah minggu use hanami, iajarhon guru ma bannami doding Ai Namarsanina in. Malas uhur, gabe ibotoh hanami ma doding ai. Diatei tupa ma bani Elim, diatei tupa ma bani amboru, kakak, inanganggi guru sikolah minggu. Halani nasiam, dingat do hanami bani doding in pakon tonah ni. Das ronsi sonari.
Sada nari hun rigat-rigat ni pardingat.

26 Maret 2006© Eben Ezer Siadari

Catatan: Tulisan on domma ongga hupatongah i THE BEAUTIFUL SARIMATONDANG, ibagas sahap Indonesia

Friday, January 27, 2006

Ambit Lang Marboru Jawa Au

Ibotoh nasiam do ija huta namargoran Kedunggalar?
Lang? Anggo nai sarupa do hita. Au pe lang hubotoh. Huta ai i tanoh Jawa Timur do gan. Sasittongni lang pala marosuh au patugahkon na lang hubotoh ija huta ai. Holi iengen-engenon nasiam au. Halani huta ni Bapa simatuakku ma ai. Janah ham namambasa on, tartawa ma ra, nimu ma i bagas uhur, "sondia do si Eben on, lang ibotoh ija huta ni simatua ni."
Tapi lang pala mahua. Sonai ma ra pargoluhanku.



Inang sinrumahku boru Jawa do. Tubuh i Jakarta. Namatorasni dalahi hun Kedunggalar nokkan ai. Anggo inang simatuakku hun Tulung Agung do. Domma ongga au anggo hu Tulung Agung. Na paling poltik pardingathu bani huta ai aima naisobut Alun-alun. Bahat partiga-tiga anggo bodari ijai janah posal (pecal) ma na tang huharosuhkon sanggah manohu hanami hu huta ai. Mattin janah murah. Humbani sogot das hubani bodari, posal, posal,posal ma lalap attup ni indahan. Halani ija pe diri mardalan, anggo sijual posal sai dong do tong.

Anggo au, niombah ni Bapa marga Siadari do. Inang pangintubuhku boru Damanik. Ambit idingat ham dong sapari donding ni Panastas Group namangkatahon, 'Boru Damanik, ulang ham lalap manggotili,' lang pala daoh hunjai hasomalan ni inang. Lang manggotili anggo tanganni, tapi podahni do tong namanggotili. Guru homa ia.

Ase biaran do hanami hubani inang ase hubani Bapa. Tapi biar marhasoman holong ni atei. Halani age pe sonai inang nami, --songon hata Indonesia-- 'anak ni inang' (Anak Mama) do hanami ganup. Lang dong Anak Papa. Hubani inang do totap hanami mangadu-adu. Ia do hasoman martinggil, tapi ia homa do hasoman marsahap martukarpikiran pakon pangadu-aduanni holsoh.
Ai do ase sanggah dakdanak au, hormat tumang do bani ganup Tulang marga Damanik. Janah tonah ni inang sanggah poso ope diri --ihatahon songon guro-guro do namin tapi nabotoh do maksudni--, anggo sihol ma au marhajabuan, anggo boi namin, marboru Damanik ma. Anggo lang dapot, siotikan marboru Tulang ma. Maksudni ra, marboru Simalungun ma. Janah ai do homa huhadearhon ibagas uhurhu, age pe pitah tartawa do au mambalosi. Halani sapari, mela do diri anggo 'Ea' ningon bani ojur-ojur sisonai ai, halani domma zaman moderen nini, lang zaman Siti Nurbaya be. Lang masa be mangalop boru napinatuduh-tuduhni namatoras. Dong anggapan na lang tuk gogoh manorihi naboru nahinarosuhkon.

Homa ase lang pala gogoh hupikkiri ai halani lang adong boru ni Tulang na sakkan na dob gok umurni. Pitah sada ope tulang boto ni inang na dob marhajabuan sanggah mulai garama au. Dua niombah ni sidea, dakdanak ope janah lae diri do.
Girah do au misir hun Sarimatondang. Dob tamat kalas 2 SMA, hu Jakarta ma au. Dob tamat, marsikolah tinggi i Bandung ma use. Tapi tonah ni inang ai hudingat do tong. Anggo marsitandaan diri pakon hasoman naboru, janah nabotoh homa boru Simalungun ia, mittor dong do otik mallobok-lobok tarottok. Songon boto on do nani nahinarosuhkon ni inang? Sonai ma deba sukkun-sukkun ibagas uhur.

Apalagi ma anggo ibotoh marhata Simalungun janah jenges homa bahasa ni, mittor mesek do diri mamparsahapkonsi, age pe hata Simalungun diri lang pitah marpasir-pasir be, tapi domma marbatu-batu, songon nahinatahon ni na deba. (Diatei tupa bani Tulang Mansen, ipaingat ham engen-engen sisonon).

Songon doding najenges ma tong-tong anggo hutangar jolma marsahap Simalungun. Gatni dong ma ai halani humbani haetekon nari domma ipasomal oppung namarombah inang hanami iparsahapkon mamakei hata Simalungun. I gareja GKPS pe homa sanggah i sikolah Minggu, marsahap Simalungun do age pe dong do homa dodingni na i bagas sahap Indonesia. Sonai homa i partonggoan. Gariada anggo dong sipartugas namarhalangan, hanami namaposo ma ipindo mambobahon doding. Pitah mambasa buku doding do namin, tapi hunjai pe lambin nabotoh ma jengesni hata Simalungun.

I rumah pe sapari, mambasa Parmahan na Madear do hanami ganup borngin paima marlajar, hansi pe sipata ngayotan diri anggo dob honsi mambasa Parmahan Na Madear ai, bapa nami mambobahon tonggo. Ganup do itonggohon. Humbani simbalog naboritan ronsi jolma namarsitaronon i sab dunia on, itonggohon. Halani ai do, ongga do hanami pakon saninakku marponop i podoman, pahula-hula boritan boltok, ase ulang dihut mambasa Parmahan Namadear ai.

Bahatni sidingaton pasal hasimalungunon on ma ra deba namambaen malas pangahap anggo juppah halak Simalungun i tanoh Jawa on.

Tapi sonaima ningon, age pe bolag do Tanoh Sunda, janah bahat do par Siattar ampa parRaya namarsikolah ijai, songon na payah do torihon halak Simalungun, apalagi boru Simalungun. Apalagi namarhata Simalungun homa. Deba sedo halani otik ni jolma Simalungun ijai. Ra halani lang nabere do uhur janah bahatan niihutkon rayoh diri.

Idah nasiam ma da? Sanggah i Jakarta au, lang margareja i GKPS be halani daoh ni gareja janah marminggu i HKBP ma. Sonai do sanggah i Bandung, margareja i GKI naman halani dohor tumang gareja ai.

Halani sisonon on ma, soppat ma lang pala gogoh hupikkiri namarboru Simalungun ai. Homa lambin bahatma nitandaan boru Toba janah somalni bani hanami parSidamanik na dos do ai. Bapa pe hun Toba do, janah bahat do homa famili hun Toba. Sedo masalah be ai, ninuhur. Marboru aha pe namin, asal ma siihutkon Kristus janah dong margani, ibotoh martondong-marboru, nadear ma ai tong. Halani sisonai ai, marSimalungun pe lang pala be nipokkuthon.

Hape bahat do dalan ibahen Tuhan pasautkon sura-sura ni jolma. Sipata dalan na lang tarimang-rimangi do ipatuduh dalan sidalanan.

Dob gok umurhu laho marhajabuan, gariada pagoktu, 31 tahun, das do sura-surakku marboru Simalungun, marboru Tulang janah marboru Damanik homa. Hansi pe ia niombahni Bapa Simatua hun Kedunggalar Jawa Timur janah natinubuhkon ni inang hun Tulung Agung Jawa Timur homa, dong do ibere Tuhan dalan ase gabe boru Damanik ia. Gabe boru ni Tulang sikahanan ia. Janah gabe boru sikahanan homa. Iboruhon Tulang ai ma au, age pe paima ai parmisi lobei hu Bapa parKedunggalar ai ampa inang parTulung Agung ai.

Janah hunjai ma lambin huparimbagashon sondia do namarTulang, marTulang Damanik, MarTulang hun Simalungun homa, age pe tading i Jakarta on do sidea. Lambin huparuhurhon ma homa sondia do sasittongni jolma Simalungun, sondia do paradatonni janah sondia do turi-turian pasal hasusuronni halak Simalungun.

Diatei tupa ma hatahonon hubani napasirsirhon ganup dalan ni hagoluhan in. Halani dob ai, hutandai ma homa piga-piga hasoman Simalungun marhitei sada milis, igoran barita-simalungun@yahoogroups.com. Marsitandaan ma homa bani Tulang namargoran Enos Purba, namangkoseihon http://www.baritasimalungun.com/. Hunjai ma hubasa barita pakon sejarah ni Simalungun janah lambin huarusi ma aha na masa i Simalungun sapari ronsi sonari. Hubotoh homa ma otik-otik sondia do parukkilon ni halak Simalungun na lalap songon bangsa nomor dua i hutani janah sondia gogoh ni uhur ni mamikkirhonsi ase dong namin sihorjahonon ase lambin marsiurupan janah marsada.

Ase dob hupikkiri on, diatei tupa ma sahali nari hataonkon hubani namanuratkon pargoluhan in. Ambit lang marboru Jawa au, ra lambin lupa ma au marhata Simalungun, lambin lupa homa ma marSimalungun. Namin, lang dousa ai. Tapi sisoya-soya ma ra, na dob ongga isisei Tuhan au marhata Simalungun i rumah ni oppung sapari, i Sikolah minggu, sanggah marguru manaksihon janah sanggah ipasu-pasu marhajabuan. Ambit lang marboru Jawa au, ra…..
© Eben Ezer Siadari

Catatan:
Piga-piga pamikkiron ibahas nasinuratkon on, terinsipirasi dob mambasa sinuratkon ni Mansen Purba I LOPOU NI MANSEN PURBA, terlobih ma ai taringat 'bahasa Simalungun namarbatu-batu,' pakon 'isisei Naibata do halak Simalungun marhitei Bibel Bahasa Simalungun.'

Wednesday, January 25, 2006

Siluah Humbani Tulang

Tulang Mansen Purba aima sahalak tokoh Simalungun. Humbani toruh ni uhur hu, huontang do Tulang ai ase roh martandang hu bloghu, aima THE BEAUTIFUL SARIMATONDANG. Janah domma homa roh au martandang hu lopouni, LOPOU NI MANSEN PURBA SH i www.mansenpurba.blogspot.com. Malas tumang uhurhu halani roh do hape Tulang ai. Iboban homa siluahni sanggah martandang ai. Ijon hupatongah-tongah ma siluah ni ai hubani nasiam hasoman partandang hu SARIMATONDANG NALAINGAN ON. Pos uhurhu, taridah ma bani nasiam sondia do jengesni hata Simalungun marhitei mambasa siluah ni Tulang on. Janah on ma sada parlajaran bakku laho manurat ibagas Bahasa Simalungun.

Dear ma jalo nasiam

Eben Ezer Siadari

MARTANDANG HU ‘SARIMATONDANG NA LAINGAN’

Nihurhu hinan pitah mangidah-idah do hansa atap aha ma na dob iparadei si Eben i ‘Sarimatondang Na Laingan’ (The Beautiful Sarimatondang), sibasaon ni partandang. Ia dong holi panorang, nihurhu hinan naulakkon use manandangi. (Ai boi do age sandihari diri martandang, boi tongah borngin, boi girah sogod, boi malebod. Boi tongkin, boi dokah. Boi tongkinin natadingkon, dob ai narohi use. Anggo horahan diri, nabuat sandiri sidimondiri anggo dong do napasirsir hinan. Ai anggo i ‘Sarimatondang Na Laingan’ in lang iparadei sidinumon age sipanganon. Sibasaon dassa.... Legan do homa pori roh diri hu Sarimatondang i Sidamanik. Anggo ijai, sonin diri roh, tarlobih halani ibotoh diri Purba, tulang ni Eben gan, mintor hesek do pasirsirsir janah paradeihon sidinumon. Gariada ra do mintor marpeok dayok i dapur, ase paksa palobei mangan do tondong ase boi mulak).

Sonin ungkab labah ni ‘Sarimatondang Na Laingan’ in, nolnol ma panonggorhu mangidah, dong hape ijin isuratkon barita parjumpahan ni na na marboru-tulang (atap na marpariban nidokan). Hudidah ma homa goran ni boruku ijin, irik gambarni, ai ma si Caroline Pintauli, boru ni abangku, Saralen Purba ondi.

Mangidah in, soppat do lobei hupadaoh panonggorhu manorihi sibasaon na legannari. Ai hurang suman do bani pangahap ni halak Simalungun paidah-idah barang patangi-tangi parbualan atap pe parjumpahan ni boru diri pakon dalahi na marpadan manjumpahisi. Pori pe tudu tarbotohdiri, pakulah na so binotoh do.

Tapi dob hudingat, na itonahkon si Eben do au ase martandang, hulajou ma mambasa alebas. Sihol botohonku aha na laho patuduhkononni bakku.

Hape, lappani do hansa barita parjumpahan ni na mar’pariban’ in. Lappa laho pabugahkon aha na ginoran (ni sidea) ‘kopdar’, lappa laho patorangkon parbualan ni par ‘kopdar’ na ipamasa sanggah tudu roh si Carolie hu Jakarta.

Lambin tartogu ma uhurhu mambasa barita in. Ai asal dong parsahapan pasal Simalungun, sihol botohonku do aha anjaha sonaha isi ni parsahapan in. Ai ma angkap sihol ni uhur, pangarapan, ase sai lambin dong ma namin na mambere uhur, pingkiran pakon gogohni doppak Simalungun, gendo tolap Simalungun mangimbang pandorab ni na masa sondahan on i tongah-tongah ni diri ni Simalungun, sonai age pandorab ni simbalog pakon partoloh, na boi mambahen roh podasni munob sasap Simalungun.

Lambin pongkut ma au mambasa barita in, humbani bagian na parlobei das hu bani bagian pangujungini, napalimahon. Botoh do homa si Eben manuratkon barita in. Ai sonin nabasa sanristei na sinuratkonni, mintor sihol basaon ma ristei na mangihut. Sonin nabasa sada bagian, sihol basaon ma homa bagian na mangihut. Hira lang ibere diri pasarankon paima bois ganup nabasa.

Dob bois ganup hubasa, baru pe roh uhur pasarankon. Baru pe hupaahap-ahap, domma hape marngayot angkula na dob rungkuy on. Hutonggor jam, domma hape lobih 3 jam au mambasa. Lang tarahap bois panorang gap pairik-irik nasinuratkon ni si Eben in. Mangapian do au. Hunja do nani iparlajari si Eben par Sarimatondang in manurat sonin jengesni. Ambit hubotoh ma namin sonin jengesni manuratkon na ibagas uhurhu pasal Simalungun, ra marosuh ma halak mambasa. Ambit ra ma namin si Eben manurat sonin jengesni ibagas sahap Simalungun, ra lambin marosuh ma halak marsahap Simalungun. Ambit ra ma namin si Eben manuratkon sonin jengesni pasal barita ni pargoluhanku, seng anjai lang sihol do uhur ni halak mambasa – sedo halani barita (ai aha ma au, jolma habian do, pargoluhonku pe paruntolon do hansa, lang taridah buahni), tapi halani jengesni manuratkon do. Sonai ma au mar-ambit-ambit, dob mambasa nasinuratkon ni in.

Ia pasal barita na sinuratkonni in, dong piga-piga na sihol hatahononku.

Sada ma ai na mardomu bani hadirion ni si Caroline, boruku. Boi do huparhatongon, dong do sittongni nasinuratkon ni si Eben in. Mintor tardadap uhurni do tongon ise si Caroline. Age pe namin tar hundong ijin naidah na malobihtu pamujini. Tapi ai pe lang mahua. Ai biakni do ipapuji-puji anggo tongon do iahap boru-tulangni.do. In homa ase marosuh halak mambasa. Ai lang piga jolma na marosuh mambasa sahap na manrisai. Songon parninggan ni Simalungun, naponopkon do rigat ni hiou.

Na paduahon ai ma pasal ‘kopdar’ in. Hubotoh ma humbani barita in hinadear ni ‘kopdar’ in. Porlu do tongon martorap bahenon ‘kopdar’. Sobali marsombuh-sihol samah parmilis, boi pasombuh sihol ni uhur padaskon na manggumol i bagas uhur, na lang sai tarsuratkon marhitei surat-e. Boi homa pagara-garahon sihol ni uhur marpambaenan dompak Simalungun, atap pe mamuho-muhoi hauhuron mansarihon (=kepedulian) Simalungun.

Anggo dear iranggi, dear homa pangkorjahonon, dear ibobahon parsahapan, dong homa na mambaen barita ronsi pangibulanni (songon ‘prosiding’ nidokan), ra boi do araphonon mulgap humbani parbualan in ‘gerakan’ atap pe horja mansarihon Simalungun. Lang pitah humbani na dihut bani parsahapan in araphonon, tapi dihut age humbani hasoman na mambasa ‘prosiding’ ni parbualan in. Ai sai dong do na lalab torih-torih aha bahenonni mansarihon Simalungun. Mansahapkon lang pala botoh ia, tapi manlahoi ra do anggo dong na patuduhkon dalan sonaha bahenonni mansarihon Simalungun.

Sada nari, na patoluhon, ai ma na mardomu bani nasinahapkon ni par ‘kopdar’ in. Pasal in alebas dassa ipabugahkon sipanurat barita. (Gakni sonai do biak ni siparbarita/’wartawan’). Halani lang tangkas nabotoh aha nasinahapkon, aha pangibulanni, hira lang dong dapot pasal in humbani barita in.

Gakni pulig do holi isuratkon pasal in. Iarapkon ase roh ni in namin humbani na mambobahon parsahapan. Tapi tubuh ma sungkun-sungkun, andigan ma dong ai?

Halani ai, ra dear anggo hunjon hujanan dobdob hinan iranggihon naijahani sisahaphonon nombas na santorap in, ise manguluhon parsahapan, ise maningkup ganupan parsahapan in sonai age pangibulanni, manuratkonsi, padashon in hu bani pagori na dihut mansahapkon, ronsi padashon hu simbuei marhitei milis atap surat-e.

Legan ma lobei anggo pitah marsombuh sihol do hansa siparayakon, pasombuh uhur na siholan hu huta hatubuhan/hagodanganni. Anggo in do hansa siparayakon, marbual simarinjaja ma ra sidearan, lanjar mangengen-engen parsahap pakon pangabak Simalungun tingki hadanakon ondi.

(Mansen Purba)

Monday, January 23, 2006

Rumah na Lang Marhondor





"Anggo domma das hanima i dalan nahuhatahon ai, torihima akkin ijai rumah na lang dong hondorni. Aima rumahnami."

Klik.

Marhitei telepon, sonaima das ni parsahapan ni sahalak hasomanku pakon hasomanni, bos ni sada perusahaan parcetakan. Rumah ni bos on i daerah Kebagusan. Hasomankon laho hu rumah ai. Dong nini laho sisahapkononni sidea.

"Ho Eben, dokah do ho i Pasar Minggu. Ibotoh ho do ra dalan-dalan i sekitar daerah ai," nini hasoman on hubakku, marhitei telepon genggamni. Goran ni pe hasoman, maningon urupion do tene. Au sasittongni lang hubotoh pala bahat dalan i Jakarta on. Tapi anggo dong hasoman na domma dokah lang juppah, sondia pe ningon parpala-palaan ma. Lang aido?

"Dear ma ai ambia," nikku ma homa.Hasomankon hasomanna dohor tumang do on sanggah i SMA Siantar pakon sanggah kuliah i Bandung. Horjani pangacara do ia. I Bandung homa. Anggo i huta, par Jorlang Hataran do halakon, dohor ni Bah Birong Ulu.Sogotni, dob honsi marjanji hanami juppah i Pasar Minggu, riap ma hanami hu dalan sitorihon nami ai. Ibagas uhurhu dong do sukkun-sukkun. mase ma ningon ai petunjuk ni si Bos ai. Mase ma ningon Rumah na lang dong hondorni ni.

I motor ni hasoman namamboan hanami, husukkun ma ia."Aha do maksud ni bos mai, ambia. Mase ma sonai iapatakkashon Rumah tanpa Pagar ai?" nikku. Marturi-turian ma hasoman hon hubakku. Nini ia, anggo si bos on tarbarita do na transparan ia i kantor ni. Janah sada lambang do ibani rumah na lang marhondor. Aima partanda natarbuka ia hubani ganup jolma. Lang pala dong marhondor rumah ni. Dob konsi ai use, Rumah tanpa lang marhondor namararti do ai, dong ahap aman, lang pala mabiar hubani panakko, atap pe parjahat halani ninuhurni, lang dong tahi-tahi ni parjahat hubani halak na bujur-bujur. Tarsonai ma, nini hasoman hon, filosofi ni rumah na lang marhondor on. On ma ra deba namalatarbelakangi bahat rumah i Jakarta on na mamakei sistem cluster.

Ongga do husukkun hasomanhu i kantor, aha do artini sistem cluster on.Namambuatsi horja i kontraktor, jadi bahat do parbinotohni pasal rumah. Sanggah husukkun ia, tartawa ia sambil igotilhon au. "Taridah maho parhuta-huta i tanoh Batak," nini hasoman hon, marbahasa Jakarta. "Sistem cluster ai ma rumah na langdong hondor ni. Ganup rumah lang marhondor."

"Bah, sondia ma anggo dong panakko?" nikku.

"Ah, botul-botul ma ho katinggalan zaman," nini. "Atapna laho arahkononmu ma panakko hun hutam age tambah bahat horja ni sidea ijon?," nini use, sambil tartawa ia.Nini hasomankon, hondor ni tiap rumah lang dong, tapi hondor ni sada-sada kelompok rumah naman na dong. Aima ra cluster nanimaksudni.

"Jadi tiap cluster pitah sada do pintu masukni. Halani ai gabe aman do," nini inang nahuparsahapkon on."Paham kan?" nini hubakku, songon gaya ni Zainuddin MZ anggo makkatahon, "Betul?"sanggah marambilan.

"Aha gunani, mase lang pala marhondor?" nikku homa.

"Ase lambin dohor hubani simbalog. Ai do maksudni,"nini.

"Jadi, domma mardear-dear ho hubani simbalogmu?" Nikku homa ma, halani rumah ni inang on nini sistem cluster do i Bintaro.

Lang ibalosi sukkun-sukkun hon.

Pondok ni turi-turian, laho ma au pakon hasomanhu na hun Bandung on manorihi rumah ni si Bos on. Age pe soppat do hanami kahou tokkin, ujungni juppah nami ma dalan ai. Itorihi hanami ma ija do rumah na lang dong hondorni. Dapot hanami ma homa. I ujung do ianan ni rumah ai. Langsung ma iparkir hasomankon motor ni i ianan parkir, dohor hon ni bona ni mangga.

Irik hujai, mittor roh ma dua halak dalahi na botang-botang, marpakeian Satpam."Bapak dari Bandung ya?" nini mansahapkon hasomankon.Dob konsi ibalosi hasomankon, ihatahon Satpam ai ma ase masuk hanami, halani domma ipaima bana hanami hun nasogot. Sambil mardalan hanami hu ruang tamu ni rumah ai, ibagas uhurhu hupahusor-husor do sukkun-sukkunhu. Lang marhondor rumah on, tapi dong satpam ni. Namararti do ai, totap lang dong ahap aman bani si Bos on, tene.Jadi, ninuhurhu ibagas, aha do arti ni lang pala marhondor?Ah tene, on ma ra i Jakarta on. Rumah lang marhondor gabe gaya ni rumah naman. Sedo nasittong-sittong halani toruh ni uhur bani halak sileban appa simbalog

.***

Sapari i hutanami i Sidamanik, das bani sonari pe, lang pala dong hondor ni rumah. Pintu ni rumah pe lang pala tutup anggo siang do. Pitah rumah ni Ibu namartubuhkon Bapa Anggi Bungaran, simbalog nami i Sarimatondang do na dong hondor ni. Aipe ninuhurhu halani tardolog do iananni rumah ai. Anggo mardalan-dalan nasiam hu Sarimatondang, tarlobihma Kampung Gareja huta nami, mittor idahon nasiam ma rumah namarbaris i topi ni dalan. Seng dong namarhondor ai.Dong do ra pasalni ase sonai. Porini laho manjomur omei, mittor boi ma pabolagon tikar hu alaman ni hasoman. Sonai homa anggo marpesta. Boi ma mambahen taratak mamakei dua, atap pe tolu alaman ni hasoman.

Ongga do marguro-guro au husahaphon hu Bapa nami i rumah i Sarimatondang. Bapa, nikku, bahen hita ma hondor ni rumah on.Ase ulang lutu lalap dakdanak marguro-guroi i alamanin, nikku.Tapi aha ma balos ni Bapa. "Ho ambia, domma padokah tu ho i Jakarta. Jadi domma maseda ra pikkiranmu. Domma palutu tu ra iahaphon ho mangidah bahat ni jolma i Jakarta. Tapi anggo hanami i huta on, ai do hiburannami. Lang tiap ari ramei jolma ijon. Anggo dong ma hondor ni rumah on, sondia ma hatani jolma akkin.Iagankon ma na lang boi be roh age ise hu rumah on,"nini Bapa.

Sip ma au.

Hupikir-pikkiri use enget-enget. Tongon do ra hatani Bapa nami ai, tene. I huta lang pala dong opei sihabiarhonon. Simbalog ta ganup aima simbalog na dob itandai hita mulai sanggah etek-etek hita. Sindohor ni sidea homa domma songon sindohorta. Tambah ni ai, anggo domma iurut-uruthon hita partuturon, yah, ganup naman tene hita namardiha-diha.Gabe taringat ma au bani sada gambar lukisan. Gambar on ipatongah i sada buku marturi-turihon pargoluhan ni halak Amerika. I bagas hatorangan ni gambar ai, lobih hurang ihatahon sonon. Sapari i Amerika, sanggah monoton opei gulmit ni goluh, janah marjuma opei jolma sibueinan, parroh ni sileban ianggap ma ai sada hiburan, sada intermezzo i tongah ni goluh ni parjuma. Taridah ma i gambar ai, dong dua halak tamu roh markuda. Tor isakkuthon simada rumah ma tali ni kuda on hu ianan panambatanni, janah ganup do pangisi ni rumah ai roh mangalo-alo. Lang dong hondor ni rumah ni sidea.

Anggo idingat-dingat hita sapari, lang pitah rumah na lang dong hondorni. Gareja pe lang dong hondorni. Gareja nami i Sarimatondang pe, dokah do lang pala dong hondorni. Pitah pintu gerbang do hansa. Sonai do homa pintu ni gareja ai. Hudingat opei, lang ongga ihussi (dikunci) gareja ai. Ra halani alasan praktis do deba ai ase lang ihussi. Sada, gakni halani bahat horja i gareja ai. Dong sermon. dong parari Kamis atap parari Jumat. Koor ninamaposo. Koor ni Bapa. Sikolah minggu, pnl.Anggo sonai ma bahat ni horja, tontu lang tarpanalom anggo dong sijolom hussi. Palani pandita ma. Tapi pandita pe lang i rumah torus.

Apalagi ma anggo gareja ai lang gareja pagaran. Anggo sittua do sijolom hussi, tong do lang tarpanalom, halani sipatah hu juma do sidea. Jadi dearanma age lang pala ihussi gareja ai.Paduahon, memang lang porlu ra ihussi gareja anggo I huta, tene. Halani, aha ma na dong ijai naboi itangko jolma? Kursi? Organ? Porini ibuat jolma pe organ ai, huja ma jualon ni? Ise homa ma na ra mamboli? Anggo iboban hu Siattar, i motor atap pe i opelet ganup ma jolma mamparsahaphon, laho huja do boanonni organ ai.Pasti dong ma homa namanandai organ ni ise organ ai. Jadi, sasittong ni lang pala dong habiaran magouan hun gareja.Napatoluhon, anjaha on do ra na tang siporlunan, pintu natarbuka anjaha lang marhussi aido ra sasittongni hadirion ni gareja. Anggo rumah ni Tuhan do ia, lang pala marhussi, tene. Ise pe boi do roh. Halak aha pe ai. Parpangkat, hatoban, nabayak atap pe nasombuh, dos do ai i lobei ni Naibata. Sonai do nini Pandita sapari. Pardousa atap pe parbujur, dos do ai i lobei ni Tuhan anggo ra do sidea roh hu Rumah ni Tuhan manosali dosa ni.

Anggo hurimang-rimangi use pasal Gareja na lang marhondor lang marhussi on, gabe sukkun-sukkun ma homa uhurhu anggo hudingat ma dodingni Panbers, doding Gereja Tua.(Masih kah kau ingat kala remaja/Bercanda bersama di samping gereja)Sukkun-sukkun hu aima, mase ma dalahi pakon naboru ai I darat ni gareja ai hansa? Anggo gareja i huta do gareja ai, lang marhussi ai. Mase ma lang masuk sidea hu gareja ai?Akkin, anggo dong nasiam nasoppat juppah pakon saninanta Benny Panjaitan ai, suba ham ge sukkun nasiam.

Tapi anggo au sandiri, bagas do pesan ni doding on. Ninuhurhu, sonon do ra pesan ni doding on. Lang pag sidea masuk hu gareja ai. Halani anggo masukma sidea, ra, horjahonon ni sidea ma na lang iharosuhkon Tuhan. Halani mabiar sidea hubani na lang iharosuhkon Tuhan ai, aido ase itaronhon sidea borgohan i samping ni gareja ai. Aima penafsiran hu pasal doding ai.Jadi anggo sonai boi homa do ra hatahonon, halani ianggap sidea opei gareja ai Rumah ni Tuhan, jadi lang pag masuk sidea halani mabiar sidea gabe seda ma Rumahni Tuhan ai anggo masuk sidea.Tapi, hombar hujai, boido homa hatahonon, dalahi pakon naboru ai do Rumah ni Tuhan, sasittongni. Halani ibotoh sidea do, Gereja adalah Orangnya, jolma do gareja, age lang ra sidea mamparseda pargaulan ni sidea, age pe dong panorang bani sidea bani bot ni ari ai.

***

Tapi aima lakan. Ganupan ai, pitah tading-tading nipardingat naman. Anggo roh ham hu gareja nami i Jakarta on, ulang pala tarsonggot nasiam anggo i bagas tingting dong ihatahon sonon. "Selama mengikuti ibadah, diharapkan jemaat mematikan telepon genggam. Hati-hatilah pada tas dan dompet, demi menjaga hal-hal yang tidak diinginkan." Sonai naman I Jakarta on. Domma masa hamagouan i gareja.Halani ai gareja pe marhondor ma. Marhussi ma homa.Tapi pos uhurta, pitah gedung ni do namarhussi. Anggo Rumah ni Tuhan nasasittong-sittongni, lang ongga marhussi ai tene.Jakarta, Desember 2005(c) Eben Ezer Siadari